يو شمېر افغان مېرمنو د طالبانو تر سيوري لاندې د نوروز جشن ولمانځه
د افغان ځواکمنو ښځو په نوم غورځنګ غړو د طالبانو د بندیزونو سره سره نوروز ولمانځه او د دې لرغوني جشن د لمانځلو پر اهمیت یې ټینګار وکړ.
دغه غورځنګ د جمعې په ورځ په یوه اعلامیه کې وویل چې دا جشن یې د نجونو د تعلیم سره د طالبانو د مخالفت په اعتراض کې ترسره کړی دی.
ښځو د طالبانو د محدودیتونو لاندې د خلکو د کلتور د لمانځلو او ستاینې پر اهمیت ټینګار وکړ.
په بیان کې ویل شوي، "نړۍ باید پوه شي چې افغان ښځې او نجونې د خپل جنسیت له امله له خپلو ټولو اساسي او بشري حقونو څخه محرومې دي، چې دا په افغانستان کې د جنسیتي توپیر یوه څرګنده بیلګه ده."
له هغه وخته چې طالبانو د افغانستان کنټرول بیرته ترلاسه کړ، پر نوروز او نورو ملي ورځو يې بنديز ولګاوه.